அதிமுகவிலிருந்து ராதிகா நீக்கம்

கட்சி விரோத நடவடிக்கைகளில் ஈடுபட்டதற்காக அதிமுக கட்சியிலிருந்து ராதிகா சரத்குமாரை நீக்குவதாக ஜெயலலிதாவால் அறிக்கப்பட்டுள்ளது.

அ.இ.அ.தி.மு.க.வின் கொள்கை - கோட்பாடுகளுக்கு முரணாக செயல்பட்டதால், நடிகை ராதிகா சரத்குமார், கட்சியிலிருந்து நீக்கப்பட்டுள்ளதாக அ.இ.அ.தி.மு.க. பொதுச் செயலாளர் செல்வி ஜெயலலிதா அறிவித்துள்ளார். இதுகுறித்து செல்வி ஜெயலலிதா இன்று வெளியிட்டுள்ள அறிக்கையில், அ.இ.அ.தி.மு.க.வின் கொள்கை-குறிக்கோள்களுக்கும் கோட்பாடுகளுக்கும் முரணான வகையில் செயல்பட்டதாலும், கட்சியின் கண்ணியத்திற்கு மாசு ஏற்படும் வகையில் நடந்துகொண்டதாலும், கட்சிக் கட்டுப்பாட்டை மீறி, கட்சிக்கு களங்கமும், அவப்பெயரும் உண்டாகும் விதத்தில் செயல்பட்ட காரணத்தாலும், நடிகை ராதிகா சரத்குமார், அ.இ.அ.தி.மு.க.வின் அடிப்படை உறுப்பினர் பொறுப்பு உட்பட அனைத்து பொறுப்புகளில் இருந்தும் நீக்கப்பட்டுள்ளதாக தெரிவித்துள்ளார். அ.இ.அ.தி.மு.க.வினர் யாரும் அவருடன் எவ்வித தொடர்பும் வைத்துக்கொள்ள கூடாது என்றும் செல்வி ஜெயலலிதா தெரிவித்துள்ளார்.

(தேர்தல் பிரச்சாரம் செய்ய மறுப்பு, சன் டிவியிலிருந்து தொலைக்காட்சித் தொடர்களை நீக்க மறுத்தது, ஜெயா டிவியுடன் ஒப்பந்தம் செய்யாத்து ஆகியவையே கட்சி விரோத நடவடிக்கைகள் என கருதப்படுகிறது.)

செய்தித் துளிகள்-1

***
முரசு சின்னத்தைப்பெற எடுத்த முயற்சிகள் வெற்றியளிக்காததால் தனது கட்சி வேட்பாளர்கள் தீபம் சின்னத்தை தேர்வு செய்யும் படி தேமுதிக தலைவர் விஜயகாந்த் கூறியுள்ளார்.

***

விடுதலைச் சிறுத்தைகள் கட்சி சில இடங்களில் அதிமுக உடன்பாட்டை ஏற்க மறுத்து தனித்துப் போட்டியிடப் போவதாக அறிவித்துள்ளனர். எனினும் அதிமுகவுடனான உடன்பாட்டை ஏற்று அதன்படி செயல்படுமாறு அக்கட்சியின் தலைவர் தொல்.திருமாவளவன் தன் கட்சியினருக்கு வேண்டுகோள் விடுத்துள்ளார்.

***

பார்வர்டு பிளாக் கட்சியிலிருந்து அக்கட்சியின் தலைவர் கார்த்திக் நீக்கப் பட்டுள்ளார்.

***

ஜூனியர் விகடன் வெளியிட்டுள்ள முதலாவது கருத்துக் கணிப்பு முடிவுகளின்படி மதுரை மத்திய சட்டமன்றத்தொகுதி இடைத்தேர்தலில் திமுக வெற்றி பெறும் என கணிக்கப்பட்டுள்ளது.

கருணாநிதி பதில்

திமுகவின் சதியால் தான் முரசு சின்னம் பறிபோனது என்ற தேமுதிகவின் குற்றச்சாட்டு குறித்து பத்திரிகையாளர்களுக்கு பேட்டியளித்த கருணாநிதி கூறியது:

இந்திய தேசிய ஆணையத்தால் அங்கீகரிக்கப்பட்ட ஆறு தேசிய கட்சிகள், நான்கு மாநில கட்சிகளுக்கு மத்திய தேர்தல் ஆணையம் ஏற்கனவே தேர்தல் சின்னங்களை ஒதுக்கியுள்ளது. அந்தச் சின்னங்களே உள்ளாட்சி தேர்தலில் போட்டியிடும் அந்தக் கட்சிகளுக்கு ஒதுக்கப்பட்டுள்ளது. இவர்களைத் தவிர உள்ளாட்சி தேர்தலில் போட்டியிடும் அனைவரும் சுயேச்சை வேட்பாளர்களாகவே கருதப்படுவார்கள். உள்ளாட்சித் தேர்தலில் சுயேச்சையாகப் போட்டியிடும் வேட்பாளர்களுக்கான 35 சின்னங்கள் கொண்ட பட்டியலில் முரசு சின்னம் இடம்பெறவில்லை. தேர்தல் ஆணையத்தில் பதிவு செய்யப்பட்டு, அதே நேரத்தில் இன்னமும் முறைப்படி அங்கீகாரம் பெறாத கட்சியாக தே.மு.தி.க. இருப்பதால் அந்தக் கட்சி கேட்கும் சின்னத்திற்கு அங்கீகாரம் இதுவரை கிடைக்கவில்லை. எனவே இதில் தி.மு.க.விற்கு எந்தவிதமான சம்பந்தமும் இல்லை. தி.மு.க.வின் மீது தேவையில்லாமல் திட்டமிட்டு கூறப்படும் குற்றச்சாட்டுகளில் இதுவும் ஒன்றாகும்.